ARI DOSA NGAGAI PENGELEPAS

MATTHEW 16:13-19

Jesus masang ngagai menoa semak nengeri Siseria PIlipi, endor Iya nanya sida murid Iya, ko Iya, “Sapa Anak Mensia, ko orang mayoh?”

Ko sida nyaut, “Sekeda ngumbai Iya John Pemaptisa. Sekeda ngumbai Elijah, lalu sekeda ngumbai Jeremiah tauka siko ari sida nabi.”

“Kati dalam penemu kita?” ko Iya nanya sida, “Sapa Aku tu?”

Ko Simon Peter nyaut, “Nuan tu Kristus, Anak Tuhan ti Idup.”

“Lantang Nuan Simon anak John!” pia ko Jesus. “Laban utai ti bendar tu ti datai ba nuan ukai ari mensia, tang diberi Apai Aku ti di serega ngagai nuan: nuan tu Peter, reti nya batu, lalu atas batu pemun tu Aku deka niri ka eklisia Aku, indah pintu neraka enda ulih ngalah ka iya. Aku deka meri ka nuan kunchi Perintah serega. Barang utai ti ditanchang nuan di dunya tu deka ditanchang di serega; lalu barang utai ti dibuka nuan di dunya tu deka dibuka di serega.”

1.     SAPA JESUS?

(i)                Iya ti Tuhan, Iya sama enggau Apai lalu Iya meh Apai

Ko Pilip bejako enggau Iya, “Tuhan, asoh kami meda Apai; nya aja utai ti dipeguna kami.” Disaut Jesus, “Aku lama bendar udah begulai enggau kita samoa; tang agi meh kita enda ngelala Aku, Pilip? Barang sapa ti udah meda Aku, udah meda Apai. Nama kebuah nuan nyebut, “Asoh kami meda Apai? Kati nuan enda arap, Pilip, Aku bisi dalam Apai lalu Apau dalam Aku?” ko Jesus bejako enggau sida murid Iya, “Jako ti udah disebut Aku ngagai kita ukai datai ari Aku. Apai ti dalam Aku, ngereja pengawa Iya empu. ~ John 14:8-10

(ii)             Iya ti Anak

Laban Tuhan ti Apai udah balat rindu ka ka dunya nya kebuah Iya meri Anak tunggal Iya, awak ka genap iko orang ti arap ka Iya enda mati, tang tau bulih pengidup ti meruan. ~ John 3:16

(iii)           Iya jako Tuhan ti idup

Apin dunya nyadi, Jako endang udah bisi. Iya enggau Tuhan, lalu Iya endang Tuhan. Kenyau ari mula kelia, Jako endang enggau Tuhan. Ulih Iya Tuhan ngaga samoa utai; nadai siti utai ti udah digaga tau nyadi enti enda ulih Iya. Jako nya pun pengidup, lalu pengidup nya mai penampak ngagai mensia. ~ John 1:1-4    

Nya alai Jako endang udah bisi dalam dunya. Taja Tuhan ngaga dunya ulih Iya, tang dunya mengkang enda nemu Iya. Iya datai ngagai menoa Iya empu, tang sida ti sama bansa enggau Iya enda nerima Iya. Sekeda amat nerima lalu arap ka Iya; nya alai Iya meri sida kuasa nyadi anak Tuhan. Sida nyadi anak Tuhan ukai ari darah tauka peneka tuboh, ukai mega ulih bapai ka mensia, tang Tuhan empu ka apai sida.   ~ John 1:10-14

Laban ulih Iya Tuhan ngaga samoa utai, di serega enggau di dunya; utai ti dipeda enggau ti enda ulid dipeda, nyengkaum kuasa bala antu, bala rajah, bala pemerintah enggau samoa kuasa sida. Tuhan ngaga samoa utai ulih Iya enggau Iya. Iya endang udah bisi apin utai bukai digaga, lalu samoa utai meruan ator ulih kuasa Iya. ~ Kolosi 1:16-17

(iv)           Iya ti KRISTUS – MESSIAH – PENYELAMAT

“Kati dalam penemu kita?” ko Iya nanya sida, “Sapa Aku tu?” Ko Simon Peter nyaut, “Nuan tu Kristus, Anak Tuhan (Apai) ti idup.” ~ Matthew 16: 15-16

(v)              PENEBUS

Iya udah ngelepas ka kitai ari pemetang, lalu mai kitai enggau likun ngagi perintah Anak ti dikerindu Iya, ulih darah Iya kitai ditebus, reti nya, samoa penyalah kitai di-ampun magang. ~ Kolosi 1:13-14

Laban endang ari peneka Tuhan (Apai), utai ti bisi ba Anak sabaka enggau iya ti dalam Tuhan (Apai). Nya alai ulih Anak, Tuhan (Apai) bebaik enggau samoa utai sakali ka di dunya tauka di serega – iya nya iya mai pemaik ulih darah Kristus ti disioh ba regang. ~ Kolosi 1:19-20

2.     Sapa Jesus Kristus dalam diri nuan?

TUHAN ENGGAU JURUSELAMAT AKU!

Laban Tuhan (Apai) udah balat rindu ka dunya nya kebuah Iya meri Anak tunggal Iya, awak ka genap iko orang ti arap ka Iya enda mati, tang tau bulih pengidup ti meruan. ~ John 3:16

Ko Jesus nyaut iya, “Aku tu meh jalai, pemendar enggau pengidup; nadai siko orang ulih datai ngagai Apai enti enda ilih Aku.” ~ John 14:6

Enggau bendar Aku madah ka kita: Barang sapa ti ninga jako Aku lalu arap ka Iya ti ngasoh Aku, bisi pengidup ti meruan. Iya enda kena ukum, tang udah ngelimpas pemati ngagai pengidup. ~ John 5:24

3.     Sebedau kita arap ka Tuhan Jesus Kristus, SAPA KITAI?

**KITAI ORANG TI BEDOSA!!!**

4.     Nama kebuah kitai bedosa?

(A) ‘Pesan Tuhan’

Ko Iya bejako enggau lelaki nya: “Nuan tau makai sebarang buah kayu dalam kebun tu, tang nuan enang sekali-kalo makai buah kayu ti tau meri penemu kena  ngelala samoa utai. Enti nuan makai buah nya, nuan deka mati. ~ Pemungkal 2:16-17

(B) ‘Penyalah Mensia Ti Ngelaban Pesan Tuhan’

Ari samoa bansa utai idup ti digaga Tuhan (Apai) nya ular ti pengabis pintar. Ular nanya indu nya munyi tu: “Kati Tuhan (Apai) amat bisi nagang saduai makai buah dalam kebun tu?” Ko saut indu nya, “Kami duai nadai pemali makai buah dalam kebun tu, kelimpah ari buah kayu ti ba tengah kebun tu. Tuhan (Apai) madah ka kami duai enda tau sekali-kali makai buah kayu nya tauka negu batang iya. Enti kami duai makai buah nya tauka negu iya, kami duai deka mati.” Lalu ko saut ular: “Nya jako ngapa, enda iya ngasoh mati. Tang kebuah Tuhan (Apai) enda ngasoh  saduai makai buah nya, laban Iya nemu, enti saduai makai buah kayu nya, saduai deka bepenemu baka Iya lalu ngelala samoa utai.” Leboh indu nya meda gaya kayu nya, lalu belemati la pemanah iya, dia iya lalu berunding ka penguntong enti iya bepenemu. Iya ngambi sekeda buah kayu nya lalu makai iya. Udah nya iya mai buah nya ngagai laki iya. Sereta udah makai buah kayu nya, saduai lalu bisi penemu, ngelala diri telanjai, nya alai saduai lalu nampal diri enggau daun kayu ara. Leboh saduai ninga Tuhan (Apai) bejalai dalam kebuh lemai nya, saduai nyungkap ka diri sebelah babas. Tang Tuhan (Apai) ngagau ka lelaki nya munyi tu; “Dini alai nuan?” Lelaki nya nyaut, “AKu bisi ninga Nuan bejalai dalam kebun tu, tang aku takut lalu belalai ka Nuan, laban aku tu telanjai.” Ko Tuhan (Apai) nanya iya, “Sapa ti madah ka nuan alai nuan nemu diri telanjai? Kati nuan bisi makai buah kayu ti enda di-asoh Aku empa nuan?” Lalu ko lelaki nya nyaut, “Indu ti digaga Nuan ka sulu aku ngasoh aku makai buah nya, nya kebuah aku makai iya.” Tuhan (Apai) lalu nanya indu nya, ko Iya, “Kati alai nuan makai buah nya?” Lalu ko saut iya, “Ular ti ngelakar aku ngasoh aku makai iya.” ~ Pemungkal 3:1-13

***DOSA DATAI ARI ADAM***

5.     Samoa mensia BEDOSA, nadai siko lurus di moa Tuhan (Apai).

Laban samoa mensia bela udah bepenyalah lalu jaoh ngejang ari mulia Tuhan (Apai). ~ Roma 3:23

6.     Nama UPAH DOSA?

***PEMATI!!!***

Laban upah dosa iya nya pemati belama-iya; tang pengasih ti diberi Tuhan (Apai) iya nya pwngidup ti meruan belama-iya, begulai enggau Jesus Kristus Tuhan kitai. ~ Roma 6:23

Dosa datai ka dalam dunya ulih siko mensia, lalu dosa iya mai pemati. Nya alai pemati ngerampit samoa bansa mensia, laban samoa mensia bela bedosa.           ~ Roma 5:12

Nya kebuah Aku madah ka kita, kita deka mati dalam dosa kita. Kita deka mati dalam dosa kita enti kita enda arap ka “Aku meh Aku.” ~ John 8:24

7.     Sapa PENGELEPAS KITAI?

~ JESUS KRISTUS~

Baka pemati ti datai ari siko mensia, baka nya mega pengangkat ari mati ti datai ari siko mensia. Baka samoa mensia ti enda tau enda mati kategal kaul sdia enggau Adam, baka nya mega samoa deka di-angkat ka ari mati kategal saum sida enggau Kristus. ~ 1 Korint 15: 21-22

Ko Jesus bejako enggau iya, “Aku tu ti pengangkat enggau pengidup. Barang sapa ti arap ka Aku deka idup, taja iya mati.” ~ John 11:25

Ko Jesus nyaut iya, “Aku tu meh jalai, pemendar enggau pengidup; nadai siko orang datai ngagai Apai enti enda ulih Aku.” ~ John 14:6

8.     Bakani kitai tau BULIH PENGELEPAS?

(A) Arap ka Tuhan Jesus Kristus

“...Lalu barang sapa ti idup lalu arap ka Aku – enda tau mati. Kati nuan arap ka tu?” ~ John 11:26

Nya kebuah Aku madah ka kita, kita deka mati dalam dosa kita. Kita deka mati dalam dosa kita enti kita enda arap ka ‘Aku meh Aku’.” ~ John 8:24

(B) Ngaku Jesus Kristus nya Tuhan kitai serta arap ka pengangkat Iya ari mati.

Enti kita ngaku enggau mulut kita, “Jesus endang Tuhan,” lalu arap enggau ati kita, Tuhan (Apai) udah ngangkat ka Iya ari mati, kita deka bulih pengidup ti baru.    ~ Roma 10:9

Munyi ko jako Bup Kudus, “Samoa orang ti besembiang nyebut nama Tuhan deka bulih pengidup ti baru.” ~ Roma 10:13

9.     Jesus pun pengidup ti MERUAN belama iya.

Laban upah dosa iya nya pemati belama-iya; tang pengasih ti diberi Tuhan (Apai) iya nya pengidup ti MERUAN belama-iya, begulai enggau Jesus Kristus Tuhan kitai. ~ Roma 6:23 

Pengasih Tuhan Jesus Kristus, pengerindu Tuhan ti Apai, enggau penyaup Roh Kudus enggau kita samoa. ~ 2 Korint 13:13

Kuasa Tuhan Ti Nyata Ba Pengidup Aku Dalam Taun 2008

~Tuhan Nyaut Sampi Aku ~

1.   Aku bisi siko pangan ti benama Florence. Kami duai nyau baka diri menyadi. Iya nyerah ka diri ngagai Tuhan Jesus Kristus serta ngaku Iya nyadi ka Tuhan enggau Juruselamat iya lalu dibaptisa ba Benuk, Sarawak. Puji Tuhan, iya mindah ari kem ke lama ngagai kem ka baru (mereti kita menyadi dalam Kristus??..kem tupi bawang ngagai regang). Pengidup ti meruan ti aemina datai ari Tuhan Jesus Kristus aja udah dempu iya lalu nadai sapa-sapa ulih ngerampas utai nya ari iya.

'Aku meri sida pengidup ti meruan lalu sida enda tau mati; lalu nadai siko orang ulih ngerampas sida ari jari Aku'. ~ John10:28

2.   Emak aku udah nyerah ka semua pengidup iya ngagai Tuhan ba bulan lapan (Ogos) taun 2008. Iya muai samoa jimat-jimat, sakang-sakang enggau pengaruh-pengaruh ka diambi iya ari bala sida manang lebuh iya ka agi ngena pengarap lama berubat ka penyakit iya suba. Orang ka ngulu ka pengawa muai pengaruh tu ianya Ps Kevin (SIB) lalu disaksika sida Uncle Hollies sebilik (Gereja Amazing Grace). Ati emak aku tebuka deka nyerah ka diri ngagai Tuhan bepun ari ka selalu enggau kami begelumu (kelompok rumah) belajar ka jako Tuhan. Ditambah mega iya selalu ninga kesaksian-kesaksian ka selalu dipekunsika bala anak Tuhan ka bisi enggau kami begelumu. Berapa bulan udah nya aba aku ga nyerah ka diri ngagai Tuhan.

3.   Menyadi aku ka nangkan aku udah pulai ngagai jalai Tuhan. Sebedau nya, iya sigi idup dalam pemetang, bepangan enggau indu laut (nyau ka 5 taun), selalu enda pulai ka rumah, enti n yema iya bisi pulai pen semina mandi enggau betukar gari aja, tinduk di rumah orang, enda berandau enggau ami sebilik, nyau enda ngelala kaban belayan diri. Tang kami sebilik enda kala putus pengarap ba iya, enda kala mantul besampi ka iya lalu aku empu enda putus-putus besampi minta Tuhan mai iya pulai baru ngagai raban domba Iya, Tuhan Jesus Kristus empu nyadi ka Pengibun iya. Lalu aku ingat ka ayat ka ba dalam Bup Kudus ka nyebut munyi tu:-

‘Raban domba Aku ninga ka munyi nyawa Aku; Aku nemu sida lalu sida nitih ka Aku. Aku meri sida pengidup ti meruan lalu sida enda tau mati; lalu nadai siko orang ulih ngerampas sida ari jari Aku.’ ~ John 10:27 & 28

Lebuh maya Pastor ari Indonesia ka benama Pendeta Zulkarnain datai keterubah iya, aku mai emak aku datai betemu enggau iya lalu minta iya nyaup kami dalam sampi besampi ka menyadi aku nya. Iya lalu minta kami besampi sambil bepasa (doa puasa). Kelimpah ari nya, ko aku ngelalau mak seduai aba aku, seduai enda tau enda berubah lalu nyerah ka diri ngagai Tuhan dulu laban sampi ka datai ari indai engau apai ka udah ngada ka kitai nyak ngasi. Tak nyata amat-amat, kira ka 2 minggu pengudah mak aku muai samoa jimat, sakang, pengaruh enggau iya empu mega nyerah ka diri ngagai Tuhan, enda lama udah nya, madi aku lalu mai pangan indu iya ka baru, bebansa Iban Bidayuh. Apu, gaga amat kami sebilik, Puji Tuhan, Haleluyah! Kena ka 15 November 2008, seduai pen betunang. Neyy, enda besai amat kuasa Tuhan! Suba, madi aku tu pama Ari Raya, lalu gagit enggau orang bebaju ka baju Melayu, betepan ka Songkok, ba dalam beg iya diperesa kami nang sigi bisi nyimpan buku ka ngajar orang bakani cara ‘mengaji’ enggau macham-macham meh utai ka besangkut-paut enggau pengarap orang nya. Tang diatu, aku amat-amat beterima kasih ngagai Tuhan laban iya udah nesal lalu rajin ka gerija. Enti suba iya enda megai Bup Kudus, diatu Bup Kudus udah ba jari iya. Maya tu udah 2 iko anak madi ku nya. Puji Tuhan! Puji Tuhan! Halleluyah!

4.   Ba bulan 6 taun 2008, tak enda mukai-mukai aku diasuh kompeni kerja ba KL enda lama nganti staff kami siko ka berenti datai ka sida bulih orang baru. Berita nya tak ngenyit endar. Aku diasuh sida terebai kin malam nya gak tang aku nguji berunding enggau bos aku di Kuching tu laban ko aku madah ka iya aku ka bekemas dulu, biasa meh kami indu sigi mayuh perengka ka dibai, bos aku pen setuju ngasuh aku ngena bilun tumu pagi ari siti. Datai terus kerja nuan ko iya. Enda nemu meh tudah aku dini endur diau, iya ga maya nya tengah bulan, kucik kusung tang aku nyerah ka semua ia ngagai Tuhan laban aku arap ka Iya deka ngatur semua ia. Datai aku di KL al uterus kereja ba HQ kami din. Udahnya bos lalu madah ka aku ngasuh aku numpang ba apartment iya dulu laban enda sempat buking bilik ba hotel. Ari siti alu dibuking sida bilik ba hotel 5 bintang, Crown Plaza siap enggau ‘package’ ngirup pagi (hotel tu sepiak endur opis aku, kira 3 minit bejalai kaki datai ba tenpat keja ku). Tang sida semina buking bilik ngambi seminggu aja. Udah seminggu aku lalu dipindah ka sida ngagai bilik ba hotel 4 bintang tang bilik ka diberi sida ka aku nya ka bendar iya enggi orang ka bepangkat besai aja diau diak, Club Floor (Evexutive) laban bilik ka bukai udah penuh tang Tuhan kitai Jesus Kristus nya penuh enggau pemeri ti ngenyit ka ati, sapa meh aku tu, samina bepangkat ‘Receptionist’ aja maya nya diberi Iya bilik Executive? Apuuuu...ukai jako sumbung tang nya meh kesaksian aku, Lepas nya aru aku dipindah ka ngagai bilik ‘Deluxe Room’. Kira nyau ka 3 minggu meh aku di KL maya nya, elaun aku RM100 sari. Datai kucik kusung, pulai mai ulai berkat ka belimpah-limpah. Puji Tuhan, cukup manah Tuhan kitai, Iya ti nyedia ka segala ia ngagai orang ti arap serta bepanggai ba Iya siko aja enggau pengabis ati. Helleluyah!

5.  Kesaksian aku ke 5 tu ka cukup meri reti ba pengidup aku. Bakatu cerita ia. Aku bepangan enggau laki aku suba cukup lama, lebih 10 taun. Ka melah pinang tang nadai cukup duit. Tang aku enda kala putus pengarap besampi ka pekara tu, tiap-tiap malam aku besampi taja leka sampi aku nya nyau ka sebaka tiap malam. Ko aku bejako enggau Tuhan: “Owh Tuhan, aku deka gawa ka Nuan dalam pengidup ti kudus, aku deka niri ka rumahtangga enggau orang ti dikesayau ka aku. Nti nyema Mandez (nama laki aku) meh orang ka dipilih Nuan nyadi ka laki aku, tolong berkat ka meh kamu duai ari segi duit laban kami duai sigi enda ulih niri ka rumahtangga enti nadai duit ti chukup (kategal enggai nusah orang tuai). Dalam nama Tuhan Jesus Kristus ti nyadi Raja serta Juruselamat kami. Amen.” Kira ka bakanya meh munyi leka sampi aku. Lalu kuasa Tuhan nya nyata. Ba pengujung taun 2007, kira-kira seminggu sebedau nyambut ari Krismas, bos besai ari menoa Canada bisi nemuai ngagai opis kami di Kuching ditu. Tak tekenyit meh kami sebuat ka bekereja diak maya nya leboh bos bansa ribai nya madah ka setiap pekerja deka nerima duit sagu ati CND$5,000.00 = RM15,000.00 siko. Apuuuu...baka ka bula baka ka bemimpi. Duit nyampau tu semina diberi sekali tu aja nadai agi ka dudi ari lepas tu. Retinya, sapa-sapa ka udah berenti kerja ari kompeni nya nadai bisi nerima duit nya lalu sapa-sapa ka datai bekereja bakompeni nya dudi ari enda mega derima duit nya. Tak betul-betul ga maya nya, kira ka ‘present’ Krismas aku ba taun 2007 nya. Tu meh belanja ka disedia ka Tuhan ngagai kami duai laki aku melah pinang. Tuhan udah ninga sampi aku serta nyaut ia enggau penuh ajih. Ai mata kami duai labuh bekeberai ngenang pemanah Tuhan ti udah nyedia ka belanja ti belimpah nya.

Lapa kami duai alu enda terus kawin taja duit udah bisi ba jari?

Tuhan mega bisi bekerja ba dalam pekara tu laban aku sigi besampi awak ka nitih ka atur enggau peneka Iya. Pengawa kami duai ka deka melah pinang bedau diatur datai ka Dez (laki aku) muka bisnes iya empu lalu aku mega diniki ka orang pangkat ngagai ‘Finance Executive’. Kami duai bela mansang lalu betumbuh dalam p mela pengawa Tuhan. Ulih pengasih Tuhan ti besai Roh Iya ngiring kami duai melayani/ besembiang ba Gereja Amazing Grace. Leboh kami duai ka benung kiroh nyedia ka ari ti ka melah pinang, tumu-tumu aku udah besampi minta Tuhan mungkus 1/11/2008 enggau darah Tuhan Jesus Kristus ti berega ngambi ka pengerami betunang kami duai bejalai enggau manah, pia mega mungkus 8/11/2008 endur kami duai begambar kawin ngambi ka ari enda ujan. Nemu kita nama utai ka nyadi sarinya? Seari-ari nganbi gambar ba dalam enggau ba luar studio, pulai kami ka studio baru, ujan lebat pen turun. Puji Tuhan ka udah mungkus arinya :)

 

Udah nya aku lalu buking 21/12/2008 (aribulan kami duai kawin) enggau Tuhan awak ka maya nya mega nadai ujan ngambi nyamai ngatur pengawa, ari maya nya pen cukup manah, semina bisi ujan mesik-mesik...akaiii, ujan romantik meh nya...haha. Tuhan mega udah nyedia ka kami duai tempat ti cukup manah endur kami duai ngaga pengerami melah pinang. Kesatu, kami duai meh orang katerubah jadi ba Gerija Amazing Grace sapengudah Gerija nya didirika. Ulih masuk rekod sejarah tu J Nambah ka nya, dewan ba Hotel Rajah Court ka dibuking kami duai iya kena ngatur pengerami melah pinang muak ka malam 21/12/2008 nya, enti nunda semina baka dewan sekula aja katerubah meda iya, laban hotel nya 3 bintang lalu udah lama. Tang kami duai enda peduli ka nya, cukup beterima kasih ba ati kami ngagai Tuhan ka udah nyedia ka tempat ka kami duai laban maya nya jam nyau jukor, hotel bukai mega udah penuh dibuking orang. Nemunya, semak 2 minggu dak endur malam pengerami nya, kami duai nerima berita ti cukup ia pengaga, sida hotel madah ka dewan udah diseruri (renovated) lalu kami duai orang ti ke-3 muka pengerami ngena dewan baru nya. Wah, ajih serta manis amai pengawa Tuhan ba dalam pengidup aku. Halleluyah! Datai ka diatu aku senyum tiap kali aku bekenang ka pekara ti udah nyadi ba pengidup ku. Ka diatu, benung senyum meh aku pia jari aku natuk litup... :)

Kesaksian aku tu ukai tuju ia kena aku ngangkat ka diri tang tuju ia semina ngambi ka ari tu ulih nguat ka antara sama diri. Ngambi ka kitai samoa nyengkaum aku empu sedar enggau nemu ianya sampi kitai enda kala dilak ka ngapa tang Tuhan nya sigi seruran ninga sampi kitai lalu nyaut samoa sampi kitai tang kemaya jam ia utai nya nyadi nyata tauka dini endor ia nyadi nyata nya tepulai ngagai peneka Apai. Kitai semina anang enda penoh besabar, enda mudah surut, enda mantul serta kakang ati lalu enda mega nyalah ka Tuhan nama kebuah Iya enda nyaut smpi kitai. Iya sigi nyaut sampi kitai tang jampat tauka lubah sampi kitai nya disaut nya tepulai ngagai kitai empu laban ukai kitai ti nagnti Iya tang Iya ti nganti kitai labanTuhan meda ati kitai.

Nyadi ba taun 2012 enggau taun ka deka dati ka jemah ila, awak ka lebih mayoh agi pejalai kitai enggau Tuhan, berita ka berita manah pasal pengawa ka udah diekereja Tuhan Jesus Kristus ba pengidup kitai ngagai orang ka lapar enggau aus ka jako Tuhan ba luar nyin serta ngagai orang ka bedau ngelala Iya pia mega ngagai orang ka bedau nyerah ka diri sepenoh ia ngagai Iya. Tuhan merkat ka kita enggau belimpah-limpah mega datai ka ulih merkat ka orang bukai lalu mai mayuh jiwa pulai ngagai Tuhan kitai Jesus Kristus. Ngambi ka mayoh agi kesaksian ulih dipekunsi ka kitai kena kitai ngemesai, ngeninggi ka, ngemulia ka nama Tuhan kitai Jesus Kristus, Tuhan enggau Juruselamat kitai. Amen.

Pengasih Tuhan Jesus Kristus, pengerindu Tuhan ti Apai, enggau penyaup Roh Kudus enggau kita samoa. ~ 2 Korint 13:13