JAKO PENULU

MASMOR 86:12

Aku deka muji Nuan enggau pengabis ati aku Tuhan, ti Apai aku; 

aku deka nusoi pemesai kuasa Nuan belama-lama. 

Shallom,

Tabi ke bala kitak semoa menyadi dalam Kristus. Ku mri besai terima kasih ngagai Apai di serga laban ulih pengasih Iya blog tu ulih disedia ka aku ngagai bala kita ke rindu deka besemak enggau Tuhan. Terpuji meh nama Tuhan kitai Jesus Kristus di endor ti pemadu tinggi, halleluyah!

Tuju blog tu kebendar iya ngambi ke kitai semoa bela tau berati ke utai ti nyadi (kesaksian) ba batang pengarap kitai Kristian serta belajar ke jako Tuhan ti idup. Aku mega deka bekunsi enggau kita kesaksian aku empu enggau mayuh kesaksian-kesaksian ari bala madi dalam Kristus ke bukai dikena ngemulia serta ninggi ke nama Tuhan kitai Jesus Kristus pia mega ngambi ke merangsang kitai semua ke aus enggau lapar ke jako Tuhan.

Ba dalam blog tu mega aku deka mantai ke bup-bup ti manah dibaca kitai ngambi ke pengarap kitai ba Tuhan tau mansang betumboh serta bebuah. 'Betumbuh serta Bebuah' retinya kitai mansang dalam Kristus ianya rindu deka belajar ke jako Tuhan enggau lebih dalam agi, mansang dalam mela pengawa Tuhan, muai pengidup ti lama lalu diada ka baru (reti diada ka baru tu deka dipekunsi ke aku ba awak ke bukai), tu meh reti pengarap kitai ti betumboh ukai senaka atas nama pengarap Kristian aja. Pengudah kitai ke betumboh (mansang) dalam Kristus kitai deka bebuah. Retinya, jako Tuhan ti idup dalam ati kitai, ti nyata dalam pengidup kitai, ti udah ngubah pengidup kitai nyadi urang baru (urang ti menyana) mesti dikunsi ke kitai ngagai urang ti beserimbai pendiau enggau kitai. Besaksi ngagai urang ti bedau ngelala Tuhan Jesus Kristus ngambi ke sida sama bela bulih ungkup pengidup ti meruan ulih Tuhan kitai Jesus Kristus.

Galatia 5:19-21 ~ Pengingin orang ti nitih ke gaya pengidup mensia ti bedosa nya nyata. Iya ngayan ka pengawa diri ti enda tuchi, kamah enggau kereja ti jai; nyembah engkeramba enggau pengawa bemanang. Orang nyadi bemunsoh, sida belaya, kepapas, ringat sereta tinggi ati. Sida beserara sereta beripih; sida bedengki, mabok, ngintu pengerami tekelalu iga enggau kamah, enggau utai ti baka nya. Diatu aku nangkan kita enggau jako, baka ti dulu: barang sapa ti ngerja utai nya enda nyambut perintah Tuhan.

Pasal 'BUAH ROH'

Galatia 5:22-23 ~ Tang Roh Kudus ngada ka buah pengerindu, pengagam pemaik, pengeliat ati, penelap, pemadas, penalok, pengemaroh ati enggau runding ti ulih nagang tuboh diri. Nadai adat ti ulih ngelaban utai nya.

Tu meh reti pengidup urang Kristian ti bebuah. Buah nya manis serta bebau rum disium urang bukai datai ke betusun-tusun urang datai deka makai buah nya. Pengidup kitai ti bebuah lalu buah ia udah dikunsi kitai ngagai urang ti aus serta lapae ke jako Tuhan mai reti kitai tu udah nyadi ke berkat ngagai pengidup urang bukai. Besai meh upah urang ti udah tetap ati serta talok ngagai Tuhan, makota pengidup nganti iya.

James 1:12 ~"...iya deka diupah enggau pengidup ti udah disemaya Tuhan ngagai sida ti rindu ke Iya."

Pemandang 2:10 ~"...Talok ke Aku, nemu ka nya tau ngasoh nuan mati, lalu Aku deka meri nuan pengidup, nyadi ke perais pemenang nuan ."

Ba blog tu mega aku deka bekunsi ke leka lagu-lagu puji enggau sembah Kristian kitai Iban, aktiviti-aktiviti tauka pengawa-pengawa ti bisi diatur bala gerija enggau berita-berita terbaru pasal pengarap kitai Kristian ti bisi nyadi ba menoa kitai Malaysia tu. Pia mega pekara-pekara ti ti tau dibai kitai semoa dalam sampi. Sapa kita ke bisi pekara ti deka pinta sangkong dalam sampi tau taip ba endur 'SAMPI PINTA' ke bisi disedia ka aku ba baruh blog tu. Awak ke kitai semoa sama bela nyukung pangan diri dalam sampi.

Blog tu ukai digaga kena ngelese, ngemeli tauka ngemaroh ke pengarap kitai siko-siko. Blog tu dikena aku mantai ke pemendar dalam pengarap kitai Kristian/ pasal Tuhan kitai Jesus Kristus. Ngambi ke kitai semoa bela ngelala sapa Tuhan ti bendar, ianya Tuhan Jesus Kristus ti siko aja ti disembah. Ngagai sapa-sapa ti bisi maca blog tu, tepulai ngagai budi bicara kita empu. Mensia nadai hak tauka kuasa ngakim sama diri. Semoa ku serah ngagai jari Apai di serga ti bekuasa ti udah nempa kitai mensia ulih pengasih Iya. Terpuji meh nama Tuhan kitai Jesus Kristus di endor ti pemadu tinggi, halleluyah!

Ngarap ke semoa sama bela diberkat ulih blog tu. Amen.

~ GOD IS LOVE ~